- 613 -

1433. Jan. 1. Liegnitz.

Herzog Ludwig bekennt, der Stadt für die von ihr gegen die Ketzer ausgeführten Befestigungen der Stadt 101 M. und 10 Gr. schuldig zu sein.

Wir Ludowig von gotes genaden herczog in Slesien herre czu Legnicz vnd czum Brige bekennen offintlich in desem briue allen, dy en sehen, horen adir lesen, vor vns vnd alle vnser nachkomen erbherren czu Legnicz, das vnser liben getrawen ratmannen derselbigen vnser stad Legnicz von vnser bete vnd befelunge vor vns vff vnser gelt vnd von vnser wegen vff vnserm thume doselbist czu Legnicz dem almechtigen gote czu lobe, dem heiligen kristen glauben zu sterckunge vns, vnsir kirchen vnd vnserm slosse zu eren vnd festenunge wedir dy vngetrawen ketzer czu Behem vorbawit vnd vorlegit habin an dem wale an dem graben an gemewerdin vnd andern festenunge hundirt ein mark vnd czehen groschin. Der selben summen geldis, dy sy also vor vns ausgegebin vnd gelegin habin, bekennen wir en vor vns vnd alle vnsere nochkomen erbhern czu Lignicz, das wir en dy schuldig sein vnd gelden sullin vnd schreyben vnd seczin en dy vff vnsere moncze der heller czu Legnicz, dy wir en denne vormols vorkaufft haben vnd czu der vorigen summen irer abelosunge, nemlich sebinhundirt sebenczig andirthalbe mark vnd sechs groschin nach des eldirn briues laute, also, das sy nu vorbasz vns vnd allin vnsern nachkomen, erbherren czu Lignicz mit der vorgenannten vnd diser summen geldis besampt in einer summen zuwiderkauffe vnd abelosunge steen sal newnde halbhundirt czwnvndczwenczik mark groschen, drey firdung vir groschin vnd nicht leichter, dy selben summa geldis, nemlich newndehalbhundirt zwn vnd czwenczig mark drey virdung vir groschen gutir Bemischer groschin Polnischer czal globen wir en vor vns vnd alle vnsir nachkomen erbherren czu Legnicz in guten trawen vnd an argelist in abelosunge vnd wedirkauffe derselben moncze vndir eynigis vnd mit sampt enander gutlich vnd czu follen gnugen czu beczalen. In krafft disz brifs, vorsigelt mit vnsirm anhangenden ingesigel, am heiligen jarstag noch Crists geborth virczenhundirt jar im dreyvnddreysigisten jare.

Bitschens Privilegb. f. LXXVIb.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866